紐卡素 阿仙奴做「大」龍鳳

猪拉多纳

英超今晚爆發前列激戰，由紐卡素主場硬撼阿仙奴。「喜鵲」唔聲唔聲，近9戰贏咗7場，今晚對住前線齊晒章嘅「兵工廠」肯定大把波入，捧1.7倍大啱數！

（now621台周日晚9:30直播）

兩隊牌面睇落無疑係阿仙奴秤先，雙方近12次喺英超對壘，「兵工廠」亦只輸過1次，但講到狀態，紐卡素反而佔優。「喜鵲」近9場英超贏咗7場，當中更砌低過熱刺同曼聯，最驚喜係佢哋近兩場喪入8球，雷米傳、射、扭瓣瓣精唔在講，高法蘭更連續5仗喺聖占士有波入，加上放冷箭有一手嘅迪奧迪刑滿復出，對住有哥斯尼未必踢得嘅「兵工廠」防線，要搵食唔難吖！

阿仙奴上仗終止連續4場不勝，其中禾確特同普多斯基傷愈後齊齊攞番射手觸覺。睇番近5次英超對戰，阿仙奴專搵紐卡素攞彩，足足入咗14球，即使艾朗藍斯大腿受傷，但仲有刑滿復出嘅韋舒亞頂替。未計尋晚啲波，阿仙奴係英超作客球隊入面火力最堅隊伍之一，9輪過後入咗20球，呢場「大」龍鳳實做得成！