聖日耳門誓破皇馬

猪拉多纳

伊巴向C朗討債

法甲西甲仲係歇冬期，兩大豪門巴黎聖日耳門（PSG）同皇家馬德里就趁呢段時間，約埋去卡塔爾多哈集訓，上演一場重量級熱身賽。皇馬為季前撬走安察洛堤還「人情債」，呢場比賽收入盡歸聖日耳門，備戰態度亦唔及對方認真，近日留守大本營操練。反觀聖日耳門提早幾日到達多哈，適應當地嘅天氣環境，加上神鋒伊巴謙莫域要報番世界盃外圍賽附加賽畀基斯坦奴朗拿度（C朗）踢出局之仇，勢必大打身價波，睇好巴黎聖日耳門主Ｗ。

（TVB 301周四晚10時45分直播）

皇馬喺聖日耳門手上搶走肥安，其中一個條件係同呢支法甲勁旅踢兩場熱身賽，收入要畀晒對方。「首回合」兩隊上年7月交鋒，皇馬憑賓施馬入波贏1比0，但要留意聖日耳門當時人腳未齊，包括缺少卡雲尼，今仗「次回合」強陣出擊，唔會輸蝕。

今仗大戰焦點落喺伊巴謙莫域同Ｃ朗兩大神鋒身上，上年11月世界盃外圍賽附加賽瑞典畀葡萄牙淘汰，無緣今年巴西世界盃，伊巴謙莫域即使表現出色都敵唔過Ｃ朗，呢位一向自視甚高嘅射手深深不忿，有機會再同冤家碰頭，必定使出渾身解數，誓要搶番風頭。
傷患困擾皇馬懶懶閒

由於西班牙天氣比法國溫和，皇馬近日留喺馬德里進行操練，並開放畀球迷參觀，氣氛輕鬆，完全唔當今場重量級熱身賽係咩一回事。事實上，皇馬受傷患問題影響，早前操練受傷嘅加里夫巴利今仗好可能缺陣，中場沙比阿朗素撞傷耳膜亦上陣成疑，教練安察洛堤只係安排簡單訓練，態度唔及一早飛去多哈、磨拳擦掌嘅聖日耳門進取。另外，中堅華拉尼有望復出，肥安準備派佢上陣「熱身」，但狀態不足，反而會累事，成為防線缺口。聖日耳門應該可以贏番一仗，名利雙收。