歐洲掃「場」舌戰熱粉關員

猪拉多纳

雖然我上兩星期冇喺電視同大家見面，但唔代表我遠離咗英超喎，相反我直頭飛咗去英國睇英超，而且仲去埋人哋練習場，睇埋英超球隊嘅訓練情況。其實喺半工作半娛樂之下，我就走訪咗歐洲幾個重要球場，包括巴黎王子球場、巴塞魯營球場、阿仙奴酋長球場同新特蘭光明球場。講歷史當然係巴塞嘅魯營最深厚啦，而且球場之大令我好震撼。但講球迷就要數巴黎王子球場，喺落大雨之下，球迷唱打氣歌唱足全場，就算和波都不停鼓勵球隊，非常好氣氛。
足總盃撐硬阿仙奴

阿仙奴酋長球場設施好新，而且場內外都好多美術設計，但票價實在太貴嘞！而新特蘭嘅光明球場原來入座率係英超前列，就算有近5萬個坐位一樣爆滿，佢嘅練習場設備更係歐洲頂級，真係令我意想不到。

講多樣有趣事情畀大家知啦！英國真係人人皆球迷，我入境倫敦嗰陣，關員見我來自巴塞，就問我有去看足球嗎？我一答有，佢就同我講佢係熱刺球迷，而且不停講佢對保亞斯同足總盃對阿仙奴嘅睇法，佢話保守嘅保亞斯離開，解放咗熱刺，仲話艾迪巴約倒戈定有好表現，話熱刺一定贏添！我足足同個關員傾咗13分鐘，但係我臨走時忍唔到口，轉身同佢講我其實係支持阿仙奴，而我認為阿仙奴一定贏到熱刺，佢笑笑口話早知係咁唔應該畀我入境。查實球迷冇口水戰又點叫球迷先？今場我撐硬兵工廠！

（now 621周日凌晨1時15分直播）