西布朗足總盃有水抽

猪拉多纳

英超球隊踢完聖誕、新年快車，今個周末又要應付英格蘭足總盃第三圈，唔少前列球隊上場聯賽已經搏到殘殘哋，傷兵問題又開始浮現，英足盃對佢哋嚟講隨時係雞肋，最好係臨場睇埋出場陣容先決定投X策略。

講番今晚啲波，英足盃同英聯盃最大分別係舉行時間唔同，英足盃每晉一級，季尾賽程會愈來愈頻密，對一啲板櫈深度唔夠嘅球隊真係好惡啃，上季韋根捧盃降班就係一個好例子。正所謂前車可鑑，相信好多需要護級嘅球隊都唔會搏得太盡，今晚第三圈其中一場全英超對碰，西布朗主場鬥水晶宮，西布朗上場人多打人少擊敗紐卡素、終止九場不勝劣績，續於主場出擊對士氣有正面幫助。水晶宮新領隊佩尼斯上任後目標十分明確，就係先要保住英超席位，盃賽未必會上心。西布朗讓半一個盤非常硬淨，上盤值博。

（周六晚11時開賽）
史篤城搵「李」出氣

另一場英冠榜首李斯特城越級挑戰英超史篤城，李斯特城喺快車檔期連贏四場，球隊料需要回氣，而且佢哋今季目標係爭升班，盃賽隨時得過且過。史篤城主場水準好穩定，上場對愛華頓如果唔係完場前輸十二碼早已全取三分，今場小讓平半盤口合理，可捧上盤。

（周六晚11時開賽）

西甲經過兩周歇冬期已正式重開，三強之一馬德里體育會作客鬥馬拉加，首選大盤。另外華拉度列主場鬥貝迪斯嘅護級大戰，貝迪斯作客例腳軟，主隊讓平半捧上盤。