馬拉加守「細」波恭候

猪拉多纳

「床單兵團」作客少大勝

踏入2014年，張峰祝各位讀者新年快樂！西甲經過歇冬期後，今晚終於戰火重燃，馬拉加喺主場迎戰聯賽「二哥」馬德里體育會。照牌面睇係馬體會高啲，但查實馬拉加歇冬前連贏兩場西甲，連同西班牙盃在內已經5場不敗，走勢好成咁，相信今晚可以為馬體會帶嚟阻力，況且「床單兵團」今季作客好少大勝，1.82倍入球細博得過。

（now632台周六晚11:00直播）
馬體會近4場作客3開細

由星光熠熠變星光四散，馬拉加今季人面全非都依然能夠以5勝5和7負戰績穩守聯賽榜中游，表現有晒交代。呢支爭氣球隊搶分策略好鮮明，今季面對火力強橫嘅球隊好似巴塞、皇馬等，都以做好防務工作為先，就算輸波都係一球起兩球止，好少輸鑊甘。加埋主場之利同歇冬前5仗不敗氣勢，有得同馬體會鍊o架！

馬體會家陣喺聯賽同巴塞同分，有力打破「皇巴」近年嘅壟斷悶局。射手迪亞高哥斯達表現大熟大勇，1月轉會市場重開自然成為大球會目標。雖然馬體會火力強勁，但每次作客都有見好就收嘅習慣。

就以近4次聯賽作客為例，取得2勝1和1負成績，當中有3場開出入球細，今晚造訪近況咁好嘅馬拉加唔易踢，大炒機會就更加微，估計都係1球上落居多，入球細機會更係高啦！