紅魔飛擒大咬天鵝

猪拉多纳

一月大清洗 香川小豆飯碗保衞戰

英超褪色勁旅曼聯會喺英格蘭足總盃第三圈（64強）主場迎戰「天鵝」史雲斯，「紅魔鬼」面對嚴重傷兵問題，盃賽場合必作輪換，隊內「瘀血」香川真司及查維亞靴南迪斯等人要為飯碗而戰，實會瞓身搏殺，獨忌大軍後防甩漏多，玩大穩過主W！

（now 621、633及660周一凌晨零時30分直播）

曼聯剛喺聯賽主場不敵熱刺，再次傷盡球迷心，賽前大軍再傳出壞消息，射手朗尼及快翼艾舒利楊格加入十字軍行列，加上箭頭尹佩斯、翼鋒拿尼、中場費蘭尼及守將菲爾鍾斯等傷兵，人手買少見少。經過漫長快車期後，「紅魔鬼」唔少主力搏殘，教頭莫耶斯被迫要輪換，相信今戰會有唔少副選上陣。
韋菲特邦尼搵到食

英國傳媒日日報道曼聯斟新兵，盛傳莫耶斯將清洗隊中瘀血，香川真司、「小豌豆」查維亞靴南迪斯同路爾斯安達臣等人都屬高危一族，唔搏堅冇運行。老臣子里奧費迪南今季走晒樣，莫帥講明佢要改善表現爭取一紙新約，但里奧同基斯史摩寧都唔穩陣，呢條防線實在難以予人信心，睇怕班波都係以攻代守。

「天鵝」開季首戰主場對曼聯大敗一比四，韋菲特邦尼射入唯一士哥，經過半季適應期開始融入球隊，喺王牌中鋒米捷缺陣之下，佢肩負士哥重責，「紅魔」後防枕住有甩漏，相信佢會搵到食。「天鵝」上場硬撼曼城僅負2比3，今次繼續放膽搶攻，隨時有意外驚喜，大盤博得過。
領隊Chit Chat

莫耶斯(曼聯)：球隊依家係有傷兵問題，但我唔會改變轉會策略，一月買人好難o架！我哋擁有龐大陣容，足以應付多條戰線。

米高盧特立(史雲斯)：雖然球隊近績唔好，但班球員信心十足，所以我唔會太擔心，嚟緊有好多硬仗，我哋會努力做到最好。