車仔好「打」得 讓得辣照捧

猪拉多纳

今晚續演英足盃第3圈，幾支名牌車路士、利物浦及曼聯相繼登場，肥叔最睇好板櫈夠深嘅車路士作客英冠打比郡，讓到球半都照捧上盤。

（now 621及633周日晚10時15分直播）

車路士今季演出表面上冇曼城、阿仙奴、甚至利物浦咁搶眼，最主要原因係佢哋冇阿古路、奧斯爾或蘇亞雷斯呢啲可憑一己之力扭轉戰局嘅球星，但講到平均實力及隊形，肥叔認為佢哋喺英超係數一數二。費蘭度托利斯、伊度奧雖然成日畀人話唔識入波，但每每去到關鍵場合都交到功課，就算另一名上陣機會較少嘅丹巴巴亞，論射術都絕對唔曳，嚟到呢啲盃賽場合隨時有機會畀佢發圍。

車仔上一輪聯賽作客擊敗修咸頓，中場林柏特、後衞伊雲洛域報稱有傷需要休息1個月，但呢場作客打比郡依然要讓到球半咁多，盤口咁硬淨，就知呢個上盤畀到人信心。
曼聯鬥天鵝玩大好過

另一場焦點賽事曼聯主場鬥史雲斯，曼聯啱啱喺主場輸畀熱刺，不過其實表現唔曳，莫耶斯依家已經冇留力本錢，每場波都要搏盡，但以佢哋今季嘅演出，讓球半好唔穩陣。「天鵝」史雲斯遇強愈強，作客奧脫福有一定反撲能力，所以捧大盤較划算。

（now 621及633周一凌晨零時30分直播）