建議保亞斯返祖家過冷河

猪拉多纳

筆者早前於本欄提過，教練係請嚟炒嘅，其中教壇新貴保亞斯近兩3年起跌之快，真係估佢唔到。2011年挾住波圖榮膺3冠王之勢入主車路士，有「新莫連奴」之稱嘅保亞斯真係炙手可熱，佢率領車仔嚟香港踢巴克萊亞洲錦標賽，當時筆者更於足總及贊助商舉辦嘅酒會仲同佢影相，好似執到寶咁開心！
同球員關係差係死穴

雖然車仔實力強橫，但佢心急換血，卻搞到同杜奧巴、林柏特等老臣關係勁差，影響士氣令戰績下滑，最終被炒，最諷刺係佢助手迪馬堤奧冷手執個熱煎堆，為老闆阿布一圓歐聯冠軍夢。

冇耐另一間英超勁旅熱刺再畀機會保亞斯，上季幾乎帶領球隊攞得歐聯入場券，點知佢舊年夏天重臨香江再戰巴克萊亞洲錦標賽，被核心加里夫巴利遲遲未落實轉投皇馬嘅消息困擾，影響季前集訓、磨合同買人策略，靈魂人物巴利仔嘅地位難以代替，而始終保亞斯同球員關係差係死穴，喺關鍵時刻一班下屬冇鬥心唔為佢賣命，最終重蹈覆轍敗走倫敦。

畢竟保亞斯年僅36歲，非常後生，Peter認為佢應該返祖家葡萄牙執教，過吓冷河先，等取得成績重建威信後再去一啲拉丁國家如西班牙等教波，熟悉嘅環境工作對佢幫助更大。
金句：東山再起等待黎明