意甲9連勝派路回歸 老婦發威屠「狼」

猪拉多纳

意甲歇冬後重開首輪即刻有重頭大戰上演，由聯賽「一哥」祖雲達斯主場迎戰「老二」羅馬，雖然話客隊「雌狼」今季17輪聯賽保持不敗真巴閉，不過考慮到佢哋歇冬前狀態開始回落，「老婦人」今仗又有「大師兄」派路傷愈回歸，挾住聯賽9連勝氣勢喺自己地頭出擊，祖記讓半一，力奇捧1.86倍上盤！

（TVB301周一凌晨3:45直播）

「老婦人」之前17輪聯賽雖然錄得1場敗仗，但查實佢哋做出15勝1和1負嘅佳績，令佢哋喺聯賽榜帶甩羅馬5分，如果今晚畀佢哋贏埋，差距拉開到8分，距離實現意甲三連霸嘅目標相當樂觀。佢哋挾住10連勝出擊，最緊要係老將派路因膝傷缺陣12月嘅3場比賽之後，終於傷愈，上周二復操據聞狀態相當理想，有佢喺中場「派牌」，使驚冇波入？
羅馬狀態大跌Watt

前線方面，「野獸」泰維斯因為家事遲咗歸隊，不過上周三報到後依然狀態唔錯，加埋已經融入球隊嘅「長人」洛蘭迪，要入波應該唔難，唔好唔記得佢哋中場仲有保羅普巴同維達爾都係入球高手，火力最信得過。

羅馬呢邊，季初10連勝係威係勢，不過隨住隊長托迪受傷，狀態回落，實力已見底，結果目前以17戰12勝5和得41分排意甲次席。睇番佢哋歇冬前7輪只得2勝5和，無可否認係氣勢走下坡，睇埋佢哋近3次出訪都靈都係輸波而歸，話之佢今晚強陣出擊，相信都係凶多吉少啦！