電訊太子搵到致勝竅門

猪拉多纳

莫雷拉由於公司騎師助手Jeremy已經功成身退，依家要靠自己安排坐騎，不過睇嚟佢仲未好習慣喎！尋日第二場葉楚航贏完「電訊太子」之後，就透露原來係「雷神」臨時臨急「放飛機」，好在輾轉下搵到同級嘅潘頓操刀，最終成功打開勝利之門，不枉佢一早叫定馬主改機票返港準備拉頭馬。航哥話今次莫雷拉「放飛機」的確為部署帶來不便，但係仍會畀多一次機會騎者，希望佢好自為之。講番匹「電訊太子」，航哥話隻馬有怕馬毛病，混入馬群一騎就掛住「岳頭」望實對手，一定要飛出外疊至肯全力衝刺，依家總算搵到致勝嘅竅門，希望可以繼續爭好成績。
       
電訊太子幕後張氏兄弟與葉楚航（中），賽後展露滿意笑容。
齊飛韁口未掂照贏

潘頓同葉楚航喺第四場憑「齊飛」再下一城，航哥成功起孖，練者談到「齊飛」時指出：「『齊飛』近仗有運，經常抽得好檔，發揮自然較得心應手。此駒較為均速，跑泥地最合腳法，不過牠轉彎時韁口尚有地方可以改善，我會盡量想辦法解決。」