AC搵阿特蘭大開年

猪拉多纳

Honda效應人人搶「功」

本田圭佑超人氣空降米蘭，不但令fans歡喜若狂，亦為球隊帶來內部競爭，呢位日援新貴幾乎可穩佔一席正選。因此其他中前場球員肯定要落多幾錢肉緊爭取表現以保飯碗，趁本田今晚暫時未上得陣，一於先下手為強，主場射爆阿特蘭大顯身價，捧AC讓球主勝，打響新年頭炮。

（TVB301周一晚10時直播）
地位受威脅卡卡必搏

本田加盟後，AC中場前人腳配搭難免會有改變，早前有傳教練阿里基想安排卡卡墮後，讓出進攻中場位置畀本田。不過呢位巴西球星已透露唔願意，為捍衞自己嘅地位及尊嚴，卡卡都要使出渾身解數。強如卡卡都受到本田圭佑威脅，更何況蒙杜利禾、蒙達利、安德列普利等二線角色，為前途而戰，冇得保留。
1月效應首戰勝率高

除競爭催促球員搏命外，AC米蘭仲有「1月效應」幫助，「紅黑兵團」過去12年有11次可於新年首場聯賽贏波，教練阿里基教波生涯，仍保持頂級聯賽新年首戰不敗紀錄。

另對手阿特蘭大長期積弱，今季聯賽作客9戰7敗，歇冬前更被祖雲達斯大炒1比4，防線如同虛設。遇上巴洛迪利、卡卡兩大世界級進攻球員，更加凶多吉少。