AC質素贏晒阿特蘭大

猪拉多纳

AC今晚喺主場迎戰阿特蘭大，勝望頗高，事關AC上半季成績唔掂，只能夠喺中下游徘徊，所謂知恥近乎勇，加上AC質素始終較阿特蘭大高出一大截，一於撐「紅黑軍」新年有個好開始，博2.04倍「讓主」。

（TVB301周一晚10:00直播）

AC貴為傳統意甲班霸，今季表現差到得人驚，17輪比賽過後僅得19分排第13位，上次贏波已經要數到去年12月初作客卡坦利亞一仗，狀態確係唔掂。好彩，佢哋件右閘阿比迪已復操，上場對國際米蘭打得唔錯嘅小將沙普拿拉，今晚亦會繼續正選披甲，支援卡卡同巴洛迪利，由華倫來投嘅法國新兵阿爾拉米，則先列後備，齋睇陣容，依然畀到人信心。

論狀態，對家阿特蘭大都唔好得去邊，近5場聯賽未贏過之餘，歇冬前主場仲要被祖雲達斯怒炒4:1，下滑到第15位，同降班區只有4分之隔，講質素，佢哋更加唔係AC嗰皮，阿特蘭大今晚造訪聖西路，想輸少粒都難喇。