紅魔補飛捉貓唔衰得

猪拉多纳

足總盃羞家負天鵝 聯賽盃莫帥最後機會

29年嚟第2次喺足總盃第3圈倒灶，昨晨畀史雲斯踢出局嘅曼聯都算羞家咯！紅魔時隔48個鐘匆匆上路，轉戰英聯盃4強首回合造訪新特蘭，雖然話一對「魔鋒」尹佩斯同朗尼繼續養傷，但英聯盃算係領隊莫耶斯今季最有機會捧到嘅殊榮，今場對住「黑貓」真係唔衰得，曼聯作客讓半一要撐上盤。

（TVB301台、廣東體育周三凌晨3:45直播）

曼聯喺英超、足總盃連環輸波，以紅魔今季嘅「質地」，相信好難喺歐聯有咩作為，加埋聯賽榜又落後緊榜首嘅阿仙奴11分，既然英聯盃已經殺到入4強，家陣曼聯唔搏呢隻盃仔仲有咩好搏呀？況且紅魔近8季3奪英聯盃，相信莫耶斯都唔想繼續佗衰家，點都會落「柯打」叫班手足做番齣好戲。
朗尼去醫院檢查未好番

據英國《獨立報》透露，朗尼喺當地時間上星期五去咗曼徹斯特一間醫院做檢查，鼠蹊傷患照計仲未好番，另一射手尹佩斯亦因大腿傷未出得，領隊莫耶斯今鋪會繼續以查維亞靴南迪斯同韋碧克掛帥，至於鬥史雲斯一戰做後備嘅卡域克同贊奴沙，照計亦會復任正選，中前場依然有番咁上下保證。
新特蘭後防雙塔缺陣

率先喺主場出擊嘅新特蘭，家陣喺英超包艇，雖然剛啱喺足總盃以3:1擊敗卡素爾躋身32強，不過對手只係「英甲仔」，唔足以反映「黑貓」嘅狀態。事實上從近期所見「黑貓」前鋒艾迪杜里走位、傳送、射門冇瓣掂，傷愈嘅史提芬費查亦未搵番狀態，首回合主場出擊威唔威脅到曼聯防線亦係一大疑問。最弊係後防雙塔奧沙同古拿都養緊傷，靠孭鑊多過食飯嘅布朗嘜「小豌豆」同韋碧克？難啲啩！
Data King 新特蘭勁開半場細

曼聯最近6次鬥新特蘭全勝。

雙方近5次喺光明球場交手有4次開入球細。

新特蘭近7戰有6場開半場細。
乜都玩錦囊 「光明」交手旺細再追

新特蘭前線冇個射手信得過，曼聯一對正選箭頭尹佩斯同朗尼又話有傷唔出得，以雙方近年喺光明球場交手頻頻開細嘅往績嚟睇，1.9倍細冇理由唔追嘅！