老細恨盃國米唔敢吔吔烏

猪拉多纳

今晚意大利盃16強繼續上演，重心推介烏甸尼斯主場對國際米蘭，國米聯賽爭標機會名存實亡，想一嘗捧盃滋味，唯有向意盃埋手，必然大打真軍。烏甸今季表現長期低迷，靈魂人物迪拿達利都意興闌珊，日前突然宣布球季結束後退休，令球隊士氣受沉重打擊，恐無心戀戰，平手盤捧國際米蘭。

（now 633及660周五凌晨4時直播）

國際米蘭上輪聯賽畀拉素絕殺，落後榜首祖雲達斯18分，爭標機會微乎其微。新老闆托希爾重金入主國米，無非想捧盃攞威，必定下令全力爭意盃。事實上，國米近年同呢個盃仔好有緣，過去4屆有兩次封王，教練馬沙利09年率領森多利亞打入決賽，前屆更協助拿玻里奪得冠軍，對應付意大利盃好有心得。以國米人腳及馬沙利嘅領軍功力，16強過關唔成問題。
烏甸領袖都跳船

烏甸尼斯今季成績大為退步，球迷歸咎於射手迪拿達利冇料到，但呢位老將都36歲，未免對佢太苛刻。迪拿達利日前宣布球季結束後掛靴，甚至有傳佢可能今個月會轉投費倫天拿，連精神領袖都採取放棄態度，試問其他隊友又點會賣命呢？唔好忘記，烏甸剛於兩個月前嘅聯賽，主場吞國米3蛋，今仗情況更悲觀。