天笑連場靚績

猪拉多纳

　　唔好又話我長氣，但凡周末跑馬，真係小生怕怕，好似上個月咁，全日賽果暴冷暴熱，十幾廿蚊又贏，幾十倍又爆得出，賭仔最怕呢類賽果，唔知開邊瓣，都唔知點捉路？！之所以，今日賽事抱着玩票性質啦，唔好太認真，唔係盞傷心。

　　第五場四班1400米。「天笑」賽績當然勁，初出輸畀「銳不可擋」及「一哥」，次仗僅跑唔贏「萬事盛」及「藍雪山」，攞住呢份賽績，點可能在四班冇機會出頭。

　　「天笑」呢次繼續增程，阿Paul應該諗過度過，唔係有需要，冇可能場場跑長二百米，不斷增程。而呢匹馬與「牛精仔」同老竇，由短途跑起，慢慢跑至中距離係正路部署，有力打開勝門。

　　第八場三班1600米。「陽明星星」今季跑3場輸晒，講笑咁講，為呢匹馬都換咗3副眼鏡，真係冇理由㗎！上季四班贏到甩晒，上到三班唔會冇得跑啩，偏偏輸到我都O嘴。

　　好嘞，今次此駒終於唔用所有配備，以不變應萬變，唔知係好定唔好，米高肯去變，應該係睇到有啲嘢唔對路，可能就只係差少少變動，或者，翻身就在今次。

　　好靚仔地快着數

　　第九場三班1400米。「好靚仔」上場輸地慢，與實力無關，我睇得隻馬幾高，二班冇問題，何況仍然在三班。

　　今日天晴地快，場地乾爽，加上，跑A欄特別有利呢類後上馬，唯一瑕疵係阿成同何澤堯好似唔多好成績交出，好在有賠率，博得過。陳華棟 資深評馬人