惡霸馬體會 當巴塞冇到

猪拉多纳

西甲射手王激戰 哥斯達K.O.美斯

西甲榜首大戰爆發！「二哥」馬德里體育會喺主場迎戰同得49分嘅巴塞隆拿。馬體會今季力壓皇馬做「首都大佬」，令唔少球迷大跌眼鏡，不過呢隊波絕對唔係虛火，「射手王」迪亞高哥斯達堅有料到，就算巴塞有美斯復出，都未必搞得掂有主場之利嘅馬體會，主隊受讓，當然撐1.7倍「讓球主勝」啦！

（now632台周日凌晨3:00直播）

馬體會今季要三線作戰，季前仲有射手法卡奧離隊，但呢班波嘅鋒力同穩定性竟然仲好過上季，教練施蒙尼確實功不可沒。射手迪亞高哥斯達大熟大勇，目前仲以19個聯賽士哥守住個射手榜二哥位，入球數字多過美斯（8球）倍幾！即使佢目標咁大會被凍結，但係馬體會最恐怖嘅地方係整體實力平均，韋拿、佐治高基、魯爾加西亞甚至乎後上王高甸，都能夠分擔入球重責，火力強勁，主場9戰全勝之餘仲喪入33球，勁得人驚！
馬體會防守力冠西甲

唔好忘記，馬體會季初喺西超盃已對過巴塞兩次，結果兩次都未能分出勝負，雖然巴塞最後憑作客入球優惠捧盃，不過馬體會喺兩回合嘅表現都唔失禮，倒戈嘅韋拿更成功喺巴塞身上拎到加盟馬體會後首個入波。今晚榜首大戰，韋拿戰意一定加倍旺盛。

馬體會唔止鋒力勁，由高甸領導嘅防線都一直保持高水平，至今聯賽只失11球冠絕西甲，賽前迪亞高哥斯達仲話，佢哋有人可以完全箝制美斯，又話有信心可以盡快重拾射門鞋，雄心壯志咁款喎！
巴塞唔集中好易出事

巴塞隆拿歇冬後保持強勢，近兩仗均大炒對手，周中主場對基達菲場西盃仲有美斯傷愈復出添，不過呢位阿根廷球王始終好番冇耐，狀態唔會十足囉。同時，巴塞今季不時出現開波初段唔集中情況，如果今仗巴塞老毛病發作先落後的話，要喺同級嘅馬體會身上反勝真係談何容易吖，主場嘅馬體會今鋪可以話係坐和望贏！
Data King 兩軍對賽例必有士哥

馬體會主場已經取得13連勝。

馬體會今季主場出擊肯定有波入。

雙方連續6次喺卡達朗球場交手，兩軍都可以喺對方身上取得「士哥」。