PSG爭盃贏波決心大

猪拉多纳

季內兩勝對手翻尋味

今晚受注賽事以盃賽做主打，阿King睇中一場法國聯賽盃八強賽，巴黎聖日耳門（PSG）作客鬥波爾多。聖日耳門季內曾經兩勝波爾多，而且佢哋今季大小通吃，無論咩盃賽都喜以強陣出擊，面對剛於聯賽落敗兼十人應戰的波爾多可再贏一次，進取更可捧聖日耳門讓球客勝。

（周三凌晨4時開賽‧馬會網上文字直播）

雙方今季首次碰頭於季初法國冠軍盃，當時聖日耳門於落後一球情況下反勝波爾多2比1，然後聯賽首循環聖日耳門作客再贏2比0，雙方整體實力明顯有分野。上周聖日耳門於法足盃第三圈面對乙組仔比斯特，依然派出伊巴謙莫域、卡雲尼、拿維斯及堤亞高施華等主力落場，足證爭盃決心，法聯盃現在八強階段更不會腳軟。
富咸諾域治派副選獻「細」

波爾多上周末聯賽主場不敵圖盧茲，而且有超過半場時間和對手同樣十人應戰，體力消耗極大，今戰未必可及時回氣，聖日耳門客Ｗ穩開，如果想有更好分頭可捧讓球客勝。

另外兩關心水落在兩場英足盃第三圈重賽，全英超對碰富咸主場對諾域治，兩軍目前護級形勢險峻，未必有餘力爭盃，預計彼此都有機會派副選落場，首選入球細。最後英冠錫周三主場鬥非聯賽隊伍馬爾斯菲，錫周三自從炒咗戴夫鍾斯後表現持續向好，看守領隊史釗活格雷表明要用實際戰績爭取一紙長約，上場聯賽大炒列斯聯6比0證明非空口講白話，今仗續於主場出戰可淨勝兩粒，讓球主勝可吼。

（周三凌晨3時45分開賽）

猪拉多纳