勝利欺善怕惡冇出悉

猪拉多纳

主場迎戰Top 3唔齊腳

澳職今日上演前列對決，墨爾本勝利主場對西悉尼流浪者，勝利今季五戰Top 3球隊僅一勝，始終未能克服遇強走樣嘅問題，今場仲有防線主力柏保路干查拉斯坐波監，情況更唔樂觀，平手盤捧客軍！

（有線64及203台周二下午4時30分直播）

墨爾本勝利上手教頭普斯迪高路十月尾改教澳洲國家隊，助教梅斯卡特坐正領軍，現時位列第四，叫做不過不失。呢班波對住次級球隊勝率高，但對住Top3球隊布里斯班獅吼、西悉尼流浪者同中岸水手往往冇料到，本季五戰上述三強僅得一勝，上月尾主場對西悉尼流浪者搏到補時先憑古希美射個靚罰球建功執番一分，前仗主場鬥布里斯班獅吼更淨吞三蛋，真係唔多掂。
西悉尼流浪者坐和望贏

查實都唔怪得梅斯卡特，墨爾本勝利上季於普斯迪高路領軍下10戰Top4球隊同樣輸多贏少，師傅都冇符，呢個徒弟仔搞唔掂都好正路。澳職球隊實力接近，打大戰一場半場失利好閒，但成日咁衰法好影響球員心理。大軍今戰有中堅利查停賽期滿復出，又輪到柏保路干查拉斯坐波監，防線唔齊腳，若然見自己喺主場出擊又懶醒谷前搶攻，隨時畀人反擊得手。

西悉尼流浪者今戰有守將拿洛卡同中場馬迪奧普積克受傷缺陣，不過，呢班波踢法超級有紀律，特別係防守十分硬淨，無論齊唔齊人都可以保持高效打法。經過上場打吡戰尾段贏波後，現時成班波士氣一流，今戰繼續穩中求勝，大有坐和望贏之力，平手盤可秤先。