帕爾馬態勇+1好路素

猪拉多纳

今晚意大利盃16強上演拉素主場對帕爾馬，拉素請老帥利查回巢領軍後，表現唔見有大改善，相信仲需要時間重建。球隊重心始終係聯賽，盃仔隨時成為利查試陣場合，實在信唔過。帕爾馬愈戰愈勇，開始心雄，爭標戰意強，仲有得受讓，必揀讓球客勝。

（now 633及660周三凌晨4時直播）
仲靠高路斯 拉素梗啞火

利查臨危受命，月初重掌拉素帥印即擊敗近況極差嘅國際米蘭，滿以為拉素大起色，點知上仗對博洛尼亞又失分，可見球隊即使有新帥都冇咩進步。拉素最大問題係仲要靠35歲射手高路斯數胡，但呢位德國國腳年事已高，加上近年傷患纏身，水準大不如前，上仗錯失一次黃金機會就係最佳例子。難怪拉素今季聯賽19戰僅入23球，火力疲弱，根本冇本錢讓波。

帕爾馬連盃賽已保持9場不敗，包括歇冬後兩戰皆勝，共入6球，前祖雲達斯射手阿馬利翻生，近兩仗獨取3球。帕爾馬作客亦好醒神，對費倫天拿、拿玻里、國際米蘭都力保不敗。帕軍喺聯賽高不成、低不就，會將注意力放喺盃賽，希望趁態勇，創一番事業，今場受讓抵玩，甚至可以直取客勝。