揸住作客入球迎華倫吼馬體會「半場和」

猪拉多纳

今晚西班牙盃16強次回合最矚目對決，梗係馬德里體育會主場火併華倫西亞。馬體會啱啱喺聯賽同巴塞硬撼一場，搏到甩肺邊有咁快回到氣，況且揸住一個作客入球在手，初段唔使急，可以睇定先食，華倫新敗亦唔冒進，加上雙方交手上半場經常不分勝負，半場和值得再追。

（周三凌晨4時30分開賽）

馬體會剛喺聯賽激戰巴塞，前場壓迫踢法搞到「地上最強」冇啖好食，最終互交白卷，不過佢哋全場作出17次犯規，搏到咁盡消耗咗唔少體力，話咁快又要踢西盃，體力未恢復亦好正常，既然眾將攰到爆，預計教頭施蒙尼會叫班手下放慢嚟踢。其實「床單兵團」有本錢咁做，因為首回合打和1比1，攞到一個作客入球，就算今仗踢成0比0亦可晉級，睇定形勢先撳掣都未遲喇。
近九次對碰八次半場和波

自從前任教頭杜傑鬧走阿爾拉米後，華倫後防冇咗個重心Lead住，經常失魂輸大意波，新帥比斯亦察覺到呢個問題，今仗作客強敵惟有踢得小心翼翼，實行玩拉布戰術，唔敢貿然進攻。睇番雙方近九次對碰，竟有八次半場打和，既然有強勁數據支持，加上一隊攰爆、一隊龜縮，初段處於膠着狀態唔奇，半場和有2.35倍好值博。