ＡＣ迎新帥盡數乙組仔

猪拉多纳

ＡＣ米蘭上仗聯賽輸畀魚腩薩斯索羅，引發大地震；教練阿里基被炒，今晚意大利盃16強ＡＣ由助教泰索迪暫時領軍，主場對乙組仔史柏斯亞。其實上季開始，一直有傳阿里基帥位不保，但會方議而不決，拖到依家先至炒佢，令球隊長陷低迷。慶幸總算有個了斷，ＡＣ可以重新上路，泰索迪為坐正亦會交足功課，遇上弱隊正好趁機打響頭炮爭取民望，今仗勢必盡數對手，首選入球大。

（now 633及660周四凌晨1時直播）

ＡＣ上仗輸得唔抵，又中柱又中楣，注定天亡阿里基，球會新揸弗人芭芭拉早已唔妥呢位教頭，佢執包袱後，意味太子女喺權鬥完全勝利。消除不明朗因素之後，管理層可以將注意力重新放回球隊，想辦法解決目前困境，都係一件好事。隨着本田圭佑加盟，ＡＣ中前人腳唔錯，呢位日本國腳上仗演出對辦，卡卡、巴洛迪利亦頻頻有波入，攻力唔成問題。

另外，傳媒言之鑿鑿指施多夫今周內接掌ＡＣ帥印，但呢位荷蘭名將冇教波經驗，即使簽約恐怕都未必做得耐。反觀泰索迪屬ＡＣ老臣子，亦擔任過球隊青年軍教練及助教，資歷勝一籌，如果佢可以把握僅有時間顯教波功力，隨時有機會爆冷坐正，所以今場幾抵都豁去出一搏，踢悅目進攻足球，爭取支持。
史柏斯亞好打有限

史柏斯亞五年前仲喺第5級別聯賽比賽，近年急起直追於上季升上意乙，但只屬中游分子，級數同意甲仍有一大段距離，難以奢望爆冷晉級，今仗入到波已經有交代。ＡＣ防線單薄，上仗被19歲小子杜文尼高貝拉迪攻入四球，或可造就史軍破蛋。