雙塔加隻翼曼城-2搵到食

猪拉多纳

足總盃重賽再遇布力般

「雙塔」加隻翼，曼城夠食「力」！「藍月亮」今晚喺足總盃第3圈（64強）重賽再戰布力般，單係「無敵主場」已經夠晒得人驚，最重要係「雙塔」尼格度同迪斯高呢期着晒火，有埋快翼捷西斯拿華斯擔正餵靚波，睇怕布力般都好難唔輸鑊甘，就算足智彩開到曼城「-2」，1.7倍「讓主」都值得捧埸。

（now621及635台周四凌晨4:10直播）

曼城首戰畀布力般逼和1:1，搞到今晚要重賽，中東表演賽掘金兼叉電之旅宣布泡湯，相信一眾戰將今晚返到自己地頭實會做番齣好戲，搵布力般祭旗。賽前最大單嘅新聞，係阿根廷前鋒阿古路克服小腿傷患可以候命，不過周末鬥卡迪夫城場英超先係「阿Kun」嘅真正戰場，今晚佢就算落場都唔慌踢得耐，不過冇相干，事關「雙塔」已經夠照！
布力般唔識死學人鬥攻

喺阿古路養傷期間，曼城8戰錄7勝1和，表現咁好有個關鍵，就係尼格度同迪斯高做到嘢，「雙塔」喺呢段期間合力炮製12個入波，化學作用同默契出晒嚟，阿古路今晚落場幾耐、甚至落唔落場都根本唔重要。法國中場拿斯尼證實左膝部分韌帶撕裂要抖8周，呢件「濕手巾」係好波，但就衰在鍾意上腳拖慢節奏，反而今仗搵番踢法直接嘅快翼捷西斯拿華斯擔正，專心餵波畀「雙塔」仲大殺傷力。

布力般首戰唔使輸個個心雄，射手基斯泰迪賽前就話隊波勝在冇壓力，可以踢得更放，有佢呢句比歷連尼就開心嘞，對於曼城呢啲進攻球隊，最驚對手唔攻啫，布力般呢隊「英冠仔」唔識死以為夠「哥利」同曼城鍊，隨時輸得仲慘。畢竟曼城今季喺本土賽事主場出擊殺無赦，12戰全勝之餘仲喪入49球，呢鋪布力般想輸少粒都難！
Data King藍月亮半場例開W

曼城今季15場主場賽事錄14勝1負，並攻入59球。

最近9場波當中，曼城足足有7場係半場領先。

布力般流浪對上4次造訪曼城錄1和3負。
乜都玩錦囊 唔怕博埋5:0、主其他

曼城今季主場出擊往往數到對手喊咁口，聯賽唔講，講盃賽吖，即使佢哋半力出擊，都試過喺英聯盃主場炒韋根5:0同韋斯咸6:0。況且彭迪利蒙首戰輸咗個肉酸波，今鋪肯定會打醒十二分精神，10倍「5:0」同5.5倍「主其他」都博得過。
足總盃賽制

現為第3圈重賽，法定時間內打和將加時30分鐘，再和則互射12碼決勝。