雄心博開齋「機」不可失

猪拉多纳

主將復出 向「最長不勝」羞家紀錄Say No！

今季仍然未贏過波嘅包尾大幡墨爾本雄心，今日主場迎戰紐卡素噴射機，梗係要出盡九牛二虎之力爭開齋啦！事關再贏唔出的話，就會創澳職史上最長不勝紀錄！小弟信佢哋「知恥近乎勇」，捧2.4倍主勝！

（有線64及203周五下午4:30直播）
噴射機近況曳

雄心今季14場聯賽得5和9負，連埋上季尾嘅5連敗，佢哋已經平咗新西蘭騎士喺2005/06球季創嘅19場不勝紀錄。如果今場繼續失分，雄心就會破埋呢個咁醜嘅紀錄，今鋪點都一定搏到盡啦！

好在賽前球隊收到好消息，王牌球星安格拿斷腳休養咗4個月後，啱啱至喺預備組賽事復出踢咗半個鐘，如無意外，呢位前荷蘭國腳有機會喺今仗披甲。中場有番安格拿喺度，成隊波嘅攻、守都會提升一個層次，再加上阿根廷前鋒莊拿芬謝文奴又係傷愈，今場復出有望做住後備先，有多兩個實力球員重新加入，信心都強啲啦！

小弟信雄心贏波唔係就咁講吓o架，因為紐卡素噴射機近況亦唔見得好出色，近5場聯賽只係得1勝1和3負。呢5場波佢哋只係入咗3球，其中兩球仲係靠對手擺烏龍，實際真正入球得一個，咁弱嘅鋒力實在令人擔心。

最慘係尼敦般斯走咗，進一步削弱球隊數胡能力，即使佢哋簽入老牌前鋒格菲斯應急，都要一段時間先可以見到成效啦！人哋雄心有決心有鋒力爭取開齋，試問飛唔起嘅噴射機，又點會唔係幫主隊開齋嘅主角吖！
頂占筍盤：墨爾本雄心（主勝）