狐狸保一哥 客擒列斯聯

猪拉多纳

「狐狸」李斯特城今晚英冠作客大戰列斯聯，「狐狸」近況大勇，近排又不斷增兵，人腳夠晒強，對住頹勢嘅列斯聯有望再勝以穩坐一哥位置，客勝值得捧場﹗
李斯特城連勝續增兵

李斯特城喺經歷上月一個小低潮後重上正軌，聯賽已獲五連勝，攻力超強，近三仗均入3至5粒，連氣勢正盛嘅打比郡都畀佢打沉，再加上「狐狸」近季不斷增兵，今個轉會窗已經簽入翼鋒馬列斯同老將菲臘斯加強實力，再加上隊中神射手紐根特同左閘高捷斯基都曾喺英超打滾過，打英冠夠晒班，而中場真禾特、馬菲占士同守將迪拿特更曾係曼聯人，有一定嘅實力，呢班波人腳好強，只要發揮正常，要贏波並唔難。

雖則話列斯聯上場因為打少一個搞到畀錫周三大炒6比0，但其實列斯聯喺上半場、未打少個之前已輸緊兩粒，可見呢隊波狀態認真曳，見到佢近四仗錄得全敗就更係捧唔落手，捧李斯特城贏波﹗

TVB 301直播