步步友遇強愈強

猪拉多纳

　　今日有兩場一級賽上演，跑親大賽，吼住大摩馬房好少錯，盃王喎，咪當佢流，第七場4件，第八場又4件，以馬海圍對手。總之，今日大摩除咗兩場盃賽，其他場次啲馬都唔好睇小，如果佢真係喺呢日搏命，又點會咁孤寒，搏兩場咁少。

　　第四場三班1200米。「得天獨厚」在港跑兩場，兩次都係得第四，前仗稍稍嫌韋達末段姐手姐腳，上次就唔同，但正所謂有心栽花花不發，好衰唔衰，入到直路遇意外，結果後上不及。

　　今次「得天獨厚」用湯美仔，呢位年青人，騎後勁馬會比韋老哥勝任，同埋，呢啲質新短途馬，跑得一兩場，漸漸入局，狀態嚟料，應該係時候出頭。

　　第七場本地一級賽1600米。「步步友」上季一出就贏，今季首仗得第三，之後再跑兩場全部贏晒，兩場都係以天馬行空姿態追過對手。

　　阿棟睇跑馬幾十年，呢匹「步步友」嗰股後勁，真係唔係人咁品，絕對係難得一見嘅良駒！今仗初遇同年齡對手，有部分係難啃，好似幾匹廐友已經各有實力，不過，佢亦係勁旅，話唔埋會係遇強愈強。

　　第九場三班1400米。「貳寶」同主馬「一寶」季初先係跑咗兩個P，跟住就整番場W，「貳寶」可能係行番類似條路，趁有好狀態搏得就搏。

　　貳寶條件勝前

　　而上次「貳寶」初跑1400米呢項路程，已經有Q，計落今次排檔好咗，負磅輕咗，機會冇理由低咗啩。