馬體會猛火「讓主」有作「維」

猪拉多纳

西甲「二哥」馬德里體育會明晨會喺主場撲擊西維爾，馬體會上周喺榜首大戰雖然未能藉地利砌低巴塞，不過各得1分都唔係壞事，今晚佢哋主場迎戰攻強守弱嘅西維爾，務求全取3分態度一定積極，1.77倍「讓球主勝」絕對信得過。

（now632台周一凌晨4:00直播）
西維爾防線遇強即漏水

馬體會今季火力強勁，迪亞高哥斯達同大衞韋拿固然係前線取分之匙。中場有好波之人阿達杜倫穿針引線，加埋一對中場孖寶魯爾加西亞同年僅22歲嘅佐治高基不時擔當後上殺手，兩人已合共貢獻咗10個聯賽入球，咁猛火唔愁冇波入。而且呢班波喺聯賽對住巴塞、皇馬都可以保持零失球，防線之硬淨亦有保證，有強勁後盾，中前場進攻自然更加得心應手啦！

對手西維爾踢法攻強守弱，前鋒卡路士巴卡近3仗入兩球狀態唔錯，中場亦有加美路同拿傑迪錫等好手，鋒力確係見得吓人，不過佢哋條豆腐防線對住巴塞、皇馬加埋失咗10球，一遇強隊即刻漏水，佢哋首循環喺主場對馬體會都輸1:3，今晚作客隨時輸得仲大鑊。