棄兩新勝馬雷神化身謎語人

猪拉多纳

　　周不時，1場賽事之內，當紅騎師可以有得揀，但箇中換人原因又未必一字咁淺，正所謂家家有求，唔一定係騎師有選擇權，練馬師亦有say，唔通擘咗面依然合作咩，呢個年代仲邊使跪地戲豬乸，大把騎師好用，唔需要再睇啲大牌騎師面色做人。耳聽三分假，眼見未為真，有道理得嚟好奧妙，我哋以為事實係咁，原來又唔係，所以，片面支持理據，信少少好嘞。

　　莫雷拉夠紅啦，梗有得揀馬騎，但一再發生疑似揀錯馬事件，當中有啲係涉及溝通上誤會，亦有啲係還人情債，所以，如果信佢嘅眼光，久唔久就會出事，搵咗自己笨。

　　今晚有兩場賽事，同場有馬剛由雷神贏完，又咁啱呢兩場佢走去騎第二隻，唔知呢次又係咪溝通出錯，或者真係揀騎，發生在第六場及第八場，雷神第六場唔要「環保戰士」，情願踎上去未跑過谷中1200米嘅「寶貝王」；第八場放棄兩勝「一見鍾情」，騎隻剛剛心律不正的「興趣」，呢兩個難題唔係咁易解開，佢好似化身謎語人，考考馬迷心水清唔清？！至於最後答案係點，都係留待讀者們自己分清。(Jack)