珍珠有利鬥志十足

猪拉多纳

　　近期蔡約翰馬冇乜點贏過，反而，東尼仔及大摩馬成日跑得好，呢個世界係圓，總有循環起伏。不過，呢句暫時唔多適用於莫雷拉，呢位老哥剛剛又3W，佢贏半個月頭馬，可能比部分騎師1季仲要多，馬圈就係咁，強弱懸殊。　　

　　第一場五班1000米。「中國好」前前後後跑6場，試過有1場跑入季軍，輸得畀「大少爺」，賽績唔係曳，唔明點解近兩場走去跑1200米，擺到明唔夠氣。

　　中國好1000米正宗

　　呢次終於作出讓步，肥仔胡部署正路，「中國好」唔再跑唔合腳法路程，轉回最正宗1000米，又肯加個面箍，整色整水，好似想出手，由於份屬冷門，小注WP無不可。

　　第三場四班1650米。「跑贏大市」睇近幾仗搵咩人跑，已經知道阿輝好想幫隻馬贏番場，之前用得郭能及柏寶，硬淨到不得了，但可惜都係贏唔到。

　　今次「跑贏大市」擺個大鼻巫上去，可能係貪佢放馬有尺寸，因為呢匹馬死步頭，唔放唔得，又睇佢有冇本事點石成金。

　　第四場四班1200米。「珍珠有利」今季主要跑1200米及1400米，因為性能狹窄，較長路程都係唔多掂，縮回谷中短途點都比田草好。如果唔係，阿苗大可以幫呢隻馬報爭周日田草1200米，佢識得變招，為咩先？一字咁淺，想贏！尤其呢次出動雷神，配搭強到冇得再強，恨贏恨得出晒面，雖然賠率比較熱，勝在好鬥志。(陳華棟 資深評馬人)