默郡雙雄足總盃各自搵食

猪拉多纳

來自英國神級樂隊Beatles故鄉利物浦嘅默西賽德郡雙雄利物浦同愛華頓，今季喺英超已被榜首三雄阿仙奴、曼城同車路士掟甩，餘下賽事主要為歐聯席位爭做四哥，既然喺英超唔夠砌，不如轉戰盃賽發圍啦！兩軍今次喺足總盃第四圈（32強）分別面對次級球隊，實力高出對手一大截，只要發揮正常，相信可以攜手晉級16強。
利物浦副選發茅吼半場細

「利市大佬」利物浦今晚作客英冠般尼茅夫，紅軍唔止傷兵滿營，三日後更要喺聯賽對細佬愛華頓，今場或會派大量副選上陣，呢班二線兵同正選嘅實力差一大截，上圈對奧咸有辦你睇，半場細值得捧場。

（now 621及635周六晚8時45分直播）
般尼茅夫主場好硬淨

依家做緊英超「阿四」嘅利物浦同細佬「拖肥糖」只係相差1分，下場打吡大戰有乜依郁隨時「阿四」都不保，梗要留力打細佬啦！紅軍上仗喺主場迎戰阿士東維拉賠了夫人又折兵，打和2比2冇咗兩分都算喇，仲傷埋中場大將盧卡斯，日前又證實右閘格連莊臣因傷復出無期，為免又再整傷主力，領隊羅渣士應會派坐到硬晒嘅副選上陣，不過紅軍咁多年嚟最大嘅弱點就係板櫈深度嚴重不足，正選同副選實力係「天與地」，好似上圈主場對英甲中下游球隊奧咸，呢班副選既冇態冇默契，踢落完全冇霸氣，結果去到下半場先打開缺口，臨完場更要靠對方擺烏龍至可以鎖定勝局，堂堂英超勁旅主場對住甲組仔先贏得兩粒，真係失禮死人呀﹗

喺足總盃呢啲盃賽，低組別球隊甚有自知之明，對住高自己成班波嘅對手都會穩陣行先，擺出鐵桶陣死守，相信般尼茅夫都唔敢同紅軍鬥攻，但咪以為般隊係任人魚肉嘅弱旅，呢隊波近四仗主場皆不敗，有力守住有意留力嘅紅軍，半場細開出有望。