中岸水手贊助續約好細界

猪拉多纳

中岸水手對紐卡素噴射機呢場喺當地叫做「F3打吡」，F3係一條幹線編號，連接澳洲新南威爾士省中央海岸同紐卡斯爾，呢兩個球會正正喺呢兩個地方，所以兩軍對碰有呢個稱號。

叫得打吡，就知兩軍地理位置好相近，每次對碰都係當地盛事，對賽往績差唔多，過去30次中岸水手贏10次，紐卡素噴射機贏9次，和咗11次。近年佢哋對碰都小心翼翼，紐卡素噴射機入球能力有限，加上中岸水手啱啱同調味料供應商續咗心口贊助，梗係唔想有乜差池，輸波咪樣衰，佢哋守強攻弱，今仗揀細啱數。
有線64及203台直播