皇馬氣勢勁大炒「格」

猪拉多纳

2014年7戰全勝冇失波！

氣勢如虹嘅皇家馬德里，今晚會喺西甲主場撲擊CF格蘭納達。皇馬踏入2014年踢咗7場比賽，全勝之餘更加一球都冇失過，狀態好到無朋友！隨住爭標大敵巴塞隆拿同馬體會接連失分，依家皇馬追到只有1分差距，對士氣有極大幫助，今晚喺巴拿貝有力大勝CF格蘭納達，「-2」照捧1.56倍「讓球主勝」！

（now632台周六晚11:00直播）

皇馬一向畀人嘅感覺係防線不穩，經常唔集中導致落後甚至失分，或者教練安察洛堤歇冬期間針對呢個問題落過藥，近期班守將明顯集中咗好多，中前場回防同攻守轉換快咗，門神一環仲勁，無論係卡斯拿斯抑或迪亞高洛迪古斯打正選，一樣都畀到隊友同球迷信心，可見安帥嘅龍門輪換政策係成功嘅。
C朗 賓施馬 巴利輪住發威

防守打得好，皇馬班鋒將當然可以無後顧之憂，全力喪攻啦！前線三叉戟C朗、賓施馬同加里夫巴利繼續輪流發威，連今季上陣減少嘅迪馬利亞近三仗都有2個入波，可見佢哋狀態真係弗到漏！唔好忘記皇馬已經有兩個禮拜冇喺巴拿貝球場比賽，今仗梗係要入多兩粒，等班捧場球迷開心吓啦！
格蘭納達遇強例輸波

作客嘅CF格蘭納達今季表現唔錯，位列中游排第10，近兩仗取得1勝1和，狀態都算OK嘅！不過呢班波一對住排名較自己高嘅球隊，戰績就真係慘不忍睹喇，當中9戰只係贏過畢爾包，其餘全部輸晒，造訪巴塞同維拉利爾仲分別淨吞4蛋同3蛋，今晚作客巴拿貝鬥「銀河艦隊」，輸幾粒都預咗啦！