車仔踩行油撞冧史篤城

猪拉多纳

今晚足總盃第4圈（32強）重頭戲，車路士主場迎戰史篤城，「藍戰士」教頭莫連奴一向心高氣傲，既然狠心將桑馬達賣畀曼聯，一定會出盡力證明自己嘅決定係正確，今晚主場對住畀佢哋食住嘅史篤城，一定踩行油撞冧呢道城牆，捧1.54倍「讓主」啦！

（now621、633及660台周日晚11:30直播）
夏薩特奧斯卡效率高

莫連奴堅決賣走連續兩年當選車路士最佳球員嘅桑馬達畀紅魔，搞到一向好撐莫帥嘅「車粉」都喪鬧，不過小妹覺得寸王教皇馬嗰陣，連全西班牙人民英雄卡斯拿斯都夠膽踢去坐冷板，家陣對住區區一位桑馬達，又有咩做唔出吖？點都好，自視極高嘅佢為咗證明自己冇做錯，今場對史篤城肯定唔會留手。

其實寸王連桑馬達都可以變賣，全因兩位愛將夏薩特同埋奧斯卡杜斯山度士今季表現極佳，前者喺英超上陣21次，就斬獲9球及5次助攻，奧斯卡上陣較少嘅15次，仍然有6個士哥及2次助攻，效率極高，呢對二人進攻中場拍檔亦都成功彌補車仔鋒線上嘅不足，令「藍戰士」近5戰每場至少入2粒。加埋伊度奧近況大勇，上仗聯賽對曼聯輕輕鬆鬆o趙3粒就盡顯功架，加埋最近6連勝當中只係失2粒，防線極穩陣，今場要拆散史篤城嘅城牆，簡直係易如反掌。
史篤城作客9場不勝

史篤城喺主場的確好難應付，車路士喺聯賽首循環作客不列坦尼亞球場時就以2:3僅負對手，但講到作客，史篤城真係非常麻麻喇，近9場都未贏過之餘當中更有6次輸波收場。仲有呀，佢哋近6次作客車路士亦全軍覆沒，當中更勁失15球、只係入過1粒，今次小妹真係唔睇好佢哋可以打破「宿命」，連想守和博重賽都好難喇。
Data King 曉士作客史丹福橋全敗

車路士連續6次主場打敗史篤城，當中5場更保持清白身。

史篤城連續9場作客未贏過。

曉士以主帥身份作客鬥車路士7戰全敗，一共入3球失19球。
乜都玩錦囊 史篤城不設防吼半場大

曉士教波成績唔算出眾，史丹福橋球場更加係呢位威爾斯領隊嘅凶地，相信佢今晚都會無啖好食。睇番史篤城最近連續8場都有失球，當中對利物浦同紐卡素兩場更各自失咗5粒，表現認真唔可靠。即然睇好車路士可以大勝一場，嫌1.45倍入球大唔吸引，不妨進取啲考慮吓2.05倍半場大。