諾在其中:大有利吼準再搏

不死鸟

五一勞動節先跑過馬，大家氣都未抖定，聽日又跑過，十場賽事七草三泥，最高班嘅賽事都只係二班賽，賽事當然冇剛喺周五咁精采，加上噚日兩場盃賽都幾有睇頭，尤其係嗰場短途錦標，柏寶騎嘅「蓮華生輝」同蔡明紹嗰匹「帝聖龍駒」鬥足一條直路，壓線時柏寶都心知不妙，用左手死都將匹馬頭壓低，呢啲真係比賽經驗，最終影相「蓮華生輝」只係以半個鼻位僅僅贏隻「帝聖龍駒」，雖然跑出嘅時間都唔曳，但係睇番「蓮華生輝」都唔係話贏得好輕鬆，呢隻馬將會遠征新加坡挑戰新航短途錦標，希望隻馬到時狀態更弗，可以贏馬為港爭光喇﹗

        講番聽日嘅心水馬，第五場四班一千米，鍾意匹「天生我財」，今季跑過兩場表現已經唔同晒，分別獲得一冠一亞，上場跑田草一千米放頭，終點前才以半乘輸畀「相見歡」，走勢不俗，睇嚟做完右前腳的手術，久休咗幾個月之後，並冇影響佢嘅狀態同鬥心，今次可以作膽。

        尾場三班千四米，繼續追捧「大有利」，呢匹馬今季八戰七度上名，表現相當忠心準繩，喺拍賣會挑戰賽已經攞咗唔少獎金，上場跑同程三班千四米，抽排大外檔，終點前先至畀「永勝多」超越，呢場搏殺失手之後，相隔個幾月冇跑，沈集成吼準至用保護權報名，一心要收復前失，狀態操到好弗，但求再贏多一場，千祈咪睇小佢。