皇馬再吼半場細

猪拉多纳

今年7全勝愛玩後勁

今晚西盃8強次回合，皇馬返主場再戰愛斯賓奴。雖然「銀河艦隊」氣勢如虹，不過近期面對密集防守，初段都踢得好辛苦，愛奴嚟到巴拿貝一定玩龜縮，加上皇馬揸住一球喺手，今仗可睇定嚟食唔使急，半場細有買趁早。

（now 632周三凌晨4時直播）

踏入2014年，皇馬喺7場正式比賽贏晒之餘，仲一球未失過，乘住巴塞同馬體會頻頻失分，重燃聯賽爭標希望。不過呢幾場波皇馬面對如切爾達、奧沙辛拿、ＣＦ格蘭納達等死守球隊，初段總係老鼠拉龜冇碇埋手，好似上仗迎戰ＣＦ格蘭納達上半場火力全開，但無論係賓施馬、加里夫巴利、沙治奧拉莫斯連番發炮，定係C朗嘅超級倒掛都無功而還，要去到下半場先搵到破門辦法，難怪近7仗開咗6場半場細喇。
愛斯賓奴作客先求穩

雖然皇馬近況弗爆，但並非如外界所料咁風平浪靜，首先傳出小將艾華路莫拉達因不滿主帥安察洛堤偏心另一青訓產品謝斯洛迪古斯，兩人曾喺更衣室吵大鑊，至於翼鋒迪馬利亞早前對切爾達被換出嗰陣，做出抓下體動作惹來非議，上仗每次掂波都畀皇粉狂噓，搞到佢勁冇癮。其實愛斯賓奴作客一向以穩行先，今季打咗12仗客場比賽，有10仗開半場細，佢哋明知嚟到巴拿貝鬥攻等同自殺，絕不會輕舉妄動。況且皇馬首回合領先1比0，亦唔會急於搶攻，預計雙方上半場冇乜交收，半場細值得追多鋪。