紅魔開火爆卡城

猪拉多纳

桑馬達登場搶蘇B風頭

桑馬達、蘇斯克查鬥搶風頭！英超今晚加開快車，焦點肯定係曼聯鬥卡迪夫城，事關「火龍」主帥蘇斯克查將會首度倒戈。不過「蘇B」想喺成名地攞威唔容易，皆因紅魔獲桑馬達以破球會轉會費紀錄加盟後，創造力同火力肯定大增，加埋尹佩斯又暗示復出，兩大「紅魔左腳王」隨時射爆卡迪夫城都似，一於捧1.68倍「讓主」。

（now623台周三凌晨3:45直播）

足總盃同聯賽盃都出晒局，英超又落後緊畀「一哥」阿仙奴14分，曼聯今季戰績可以用「災難性」嚟形容。紅魔日前落實以3,710萬鎊羅致車路士翼鋒桑馬達，大家都知曼聯一向最缺乏創造型球員，今晚有扭得、射得仲要傳得嘅桑馬達處子登場，確係令失望咗半季嘅「曼迷」重新充滿期待。
尹佩斯暗示復出

桑馬達加盟之後，荷蘭射手尹佩斯透過twitter歡迎呢位左腳仔，仲留言話「星期二見」，英國《衞報》就指12月整傷大腿嘅「RVP」想暗示今晚復出，兩大左腳王齊齊壓陣，對住近4場聯賽作客輸晒嘅卡迪夫城，要省番兩、三粒絕對唔難啦！

曾經幫曼聯勇奪「三冠王」嘅蘇斯克查，賽前自爆當日簽約接掌卡迪夫城後，第一件事就係Check賽程睇吓幾時倒戈，又決定從曼聯借入韋費特沙夏至季尾兼簽入守將法比奧達施華，加埋史篤城前鋒堅韋尼鍾斯亦落實加盟，當中法比奧達施華仲有望落場倒戈添，一口氣招攬3名生力軍，擺到明想喺奧脫福再威過喎！
蘇B冇搵費Sir教路

雖然「蘇B」賽前自爆做教練後從來冇搵過費格遜教路，好似好醒咁，之不過佢都好忌桑馬達，話希望呢位西班牙仔趕唔切披甲，查實「蘇B」咁擔心又唔係冇道理嘅，畢竟卡迪夫城近6場聯賽勁失16球，對住韋斯咸同新特蘭呢啲鋒力麻麻嘅隊伍都同樣失兩粒，造訪矢志反彈嘅曼聯仲邊有得剩吖！
卡城頭槌入波冠英超

卡迪夫城有35%入球嚟自頭槌，比例冠絕英超。

「火龍」近6場英超勁失16球，場均失2.6球。

曼聯今仗贏波嘅話，英超時代主場積分將突破1,000分大關。
維迪停賽紅魔「大」鑊

曼聯獲桑馬達加盟，前線無論搭尹佩斯抑或韋碧克都夠晒煞食，但考慮到後防靈魂尼曼查維迪停賽，卡迪夫城前線「孖寶」格力洛尼同費沙甘保又鬼咁Fit，大家都有入球本錢，1.57倍大梗要吼實啦！