皇馬愛斯賓奴「細」不兩立

猪拉多纳

聽朝舉行嘅西班牙盃8強次回合賽事，首回合領先一球嘅皇馬回師主場鬥愛斯賓奴，佢哋今仗除咗要力爭出線外，同時亦要刷新球會嘅不失球紀錄，加上皇馬最近甚少大炒對手，既然今仗入球中位數係3.5球，不妨考慮2倍入球細。

（now632台周三凌晨4:00直播）
挑戰不失球紀錄

「銀河艦隊」上仗淨勝CF格蘭納達2:0後，已經連續659分鐘保持清白身，只要今場再保不失，就可以打破球會喺94/95年球季創下嘅708分鐘不失球紀錄，今仗擔正嘅門將卡斯拿斯梗係希望幫球隊改寫紀錄，愛斯賓奴想偷雞睇怕都幾難。事實上，皇馬近6場賽事只得1次攻入對手兩球以上，而且佢哋首回合已有一球喺手，無必要炒起對手。更何況佢哋下場要出征聯賽主場不敗嘅畢爾包，今場留力有咩咁出奇。

愛斯賓奴作客鋒力麻麻，近4場作客入得兩球咁多，相信聽朝都冇咩機會破蛋。但呢班波往往遇強愈強，佢哋今季先後3次惡鬥皇馬、巴塞，全部都係僅僅輸一粒。睇番佢哋近4次同皇馬交鋒，亦未試過失多過兩粒，皇馬想入波亦唔容易。

首回合：皇客勝1:0