寸王Dream車扑得錘

猪拉多纳

送舊迎新打造最佳陣容

周四凌晨英超倫敦打吡，車路士主場迎戰韋斯咸。經過一輪「送舊迎新」，「寸王」莫連奴心目中最完美嘅「戰車」已經打造得七七八八，相信下半季會愈Run愈順，向各大錦標全力進發。韋斯咸今季遇強即腳軟，面對現時聯賽榜前四名球隊最少輸兩粒，熱捧1.5倍讓球主勝。

（now 622周四凌晨3時45分直播）

車路士領隊莫連奴喺今個轉會窗好忙碌，先後送走奇雲迪布尼、桑馬達、艾辛等「冗員」，然後再簽番尼曼查馬迪、穆罕默德沙拿，有傳佢仲斟掂埋馬體會嘅迪亞高哥達斯喺今夏加盟，悉心打造自己心目中嘅最佳陣容。睇番車仔上半季十一場主場聯賽贏咗十場，當中包括擊敗曼城、利物浦、曼聯等死對頭，發揮已經好穩定，下半季有呢班由莫帥親自欽點嘅球員壓陣，預計整體表現及成績只會有過之而無不及。
韋斯咸新兵作用難料

韋斯咸為咗護級亦積極增兵，繼買入中堅羅渣莊臣後，最近亦成功借用兩名意大利兵洛斯連奴及波里路，不過能否即時產生作用又係另一回事。韋斯咸今季對親強隊都冇運行，未計周三凌晨賽果，目前聯賽榜頭四名球隊喺聯賽都能淨勝「錘仔」兩球或以上，車路士首循環作客都大勝三比○，今次主場出擊又點會例外？