畢爾包+1贏畀你體

猪拉多纳

西班牙盃八強次回合頭場賽事，由畢爾包於主場迎戰馬德里體育會。馬體會雖然貴為聯賽二哥，但近期表現明顯跌Watt，箭頭迪亞高哥斯達「立晒油」，對住今季主場無敵的畢爾包仲要讓波，實在係過晒火位，一於捧「巴斯克雄獅」讓球主勝。

（周四凌晨3時開賽）
馬體會3線作戰攰爆

今季馬體會於聯賽與巴塞隆拿及皇家馬德里鼎足而立，絕對唔係嘢小。不過，「床單兵團」板櫈深度遠遜兩大班霸，又要應付三條戰線，近期明顯疲態畢露。馬體會除上仗大勝不自量力玩對攻的華歷簡奴外，其餘比賽都贏得好辛苦，包括首回合僅靠中堅高甸的入波1比0險勝畢爾包。尤其係馬體會實在太倚賴迪亞高哥斯達數胡，但呢位箭頭近期腳風欠順，令球隊攻力大受影響。

畢爾包自入主新主場後，仍不改其「地頭龍」本色，今季於新聖馬美斯球場出戰12場比賽，竟豪取10勝2和的佳績，可說是信心爆棚，連巴塞亦係其手下敗將，造訪此地可謂九死一生。況且馬體會現時有一球在手，隨時踢守勢波保住勝果，主場未輸過的畢爾包仲有得受讓簡直筍到暈，讓球主勝咪錯過。