維迪斯咬牙博反彈

猪拉多纳

周六凌晨荷甲獨腳戲直播戲碼，連續三場聯賽失分嘅維迪斯主場迎戰啱啱炒教練嘅榜尾球隊海牙，波童相信係主隊反彈好時機，捧1.6倍讓球主勝。

（now 670周六凌晨3時直播）

維迪斯歇冬前原本和榜首隊伍阿積士並駕齊驅，不過歇冬後成績大跌，自從重開後首仗靠補時階段入波險勝施禾利，接連鬥奈梅亨、飛燕諾及阿爾克馬爾都失分，表現絕對唔合格。海牙亦唔好得幾多，對上四場聯賽輸三場，而且平均每場失接近三球，周中主場輸完畀荷華高斯○比三後，球會正式宣布辭退教練史甸治，由助教亨特費沙擔任看守教練，而且最慘係中場靈魂、目前球隊聯賽首席射手之一嘅基靴治繼續受傷缺陣，所以唔好期望佢哋短期內可以脫胎換骨。
海牙豆腐防線難捱

其實睇番維迪斯對上幾場比賽嘅賽後數據，佢哋都係控球比率較多嘅一方，失分只能怪前線把握力不足，既然今場對手海牙有條踢咗二十二輪聯賽失五十一球嘅豆腐防線，只要維迪斯醒醒定定，有力贏番場漂亮勝仗。