多蒙特反彈風捲殘雲

猪拉多纳

德甲雲達不來梅主場迎戰多蒙特，不來梅今季戰鬥力進一步下滑，近期成績及表現都弱過「藥煲」，根本無力抵擋正全力追分嘅多蒙特來犯，黑柴撐讓球客勝。

不來梅今季改由杜特執教，呢位教頭好水皮，目前排第12位表面睇唔算太差，但睇埋表現就真係唔開胃，球隊無論攻守組織都冇睇頭，到目前攞到20分真係超好彩，尤其歇冬後表現更曳，先喺主場遇包尾嘅布倫瑞克，悶和0比0之餘連攻勢都唔多，上仗對奧格斯堡更加畀人完爆，戰果雖然只輸1比3，但唯一入球都係靠對手布歷卡自擺烏龍，佢哋根本唔識入波。今仗雖然有肯特同奧拜尼亞克兩名中場傷愈復出，但隊長富斯同中場伊基斯繼續缺陣，最慘仲係左閘辛迪亞高加西亞上仗被逐要停賽，佢嘅位置由久疏戰陣嘅盧卡斯舒密斯頂上，今晚佢要對住全德甲甚至全歐洲最快最弗嘅攻擊手奧巴美揚，相信連追都冇得追，注定要食塵。
作客炒得起雲達不來梅

多蒙特今季因傷兵問題影響成績，上仗作客贏布倫瑞克至終結4輪不勝，球隊目前仍然有蘇保迪、根度簡同巴拉斯塞高斯基等傷兵，中堅曉姆斯上仗傷愈復出踢足全場之後又傷過要抖兩周，不過另一中堅柏柏斯達夫普路斯傷愈趕及倒戈。多蒙特主要傷兵問題喺後防，但進攻乏力嘅不來梅好難考驗到佢哋防線，至於中前場人腳都算整齊，佢哋對不來梅已經保持5連勝佳績，近兩季作客先後贏2比0同5比0，今季嘅不來梅比近兩季更差，相信多蒙特唔只贏一粒。