紅魔蓄細待發!

猪拉多纳

富咸奧脫福擺鐵桶陣死頂

曼聯主帥莫耶斯今季聯賽24戰從未試過派出相同正選11人出戰，呢個「輪換怪魔」打到今時今日仲未砌出最佳陣容，變陣變到班兵失晒魂，而且兩翼斬中戰術完全冇效，今晚主場迎戰嘅對手雖然只係包尾大幡富咸，不過面對對手排出嘅「鐵桶陣」，爭勝本錢依然欠奉，由於大細中位數調高至3.5球，不如玩細盤仲實際！

（now 621周一凌晨零時直播）
過度輪換 自己攞嚟衰

根據世界著名數據公司opta統計數字顯示，莫耶斯本季英超24戰先後作出過83個變動，場場個陣都唔同，中堅組合都用過7對搭檔，中場中就用咗13個不同組合，變陣變到亂晒龍！查實老將里奧費迪南之前都投訴過莫帥成日臨開波前先至講邊個打正選，令球員無法做好心理準備，加上瘋狂試陣，班兵打到下半季都仲未磨合到絕非偶然，亦可以話莫耶斯自己一手造成嘅亂局。

莫耶斯1月簽咗猛將桑馬達，令「魔粉」有番一絲希望，可惜佢堅持用兩翼側擊戰術，上場對住史篤城都係瘋狂傳中死撼爛撼，但係人都知史篤城中間幾條大杉最怕對手打地波短傳入楔，反而應付高空波就非常有把握，莫耶斯偏偏捨易行難，坐擁尹佩斯、朗尼同桑馬達等好波之人但就學人打高波，結果輸波自取其辱。另曼聯今仗仍有中堅里奧費迪南、莊尼伊雲斯同中場費蘭尼及翼鋒拿尼等養傷，宣布季尾跳船嘅隊長尼曼查維迪就可復出，料會同基斯史摩寧扼守中路。
信心危機 往績難作準

富咸主帥梅倫史甸會倒戈鬥曼聯，佢早前簽入「紅魔鬼」小將賴恩端尼基夫同拿尼奧高爾都係為未來鋪路，真正有用新兵係希臘射手美度古同熱刺借將賀治比，兩人將成為球隊護級重要棋子。曼聯近7次對富咸贏晒，不過今季有破紀錄之王莫耶斯領軍呢類數據可以擺埋一邊。富咸攻力有限，去到奧脫福都係擺鐵桶陣死守博1分，曼聯現時最唔擅長就係破密集，加上班波依家信心低迷，失分唔奇，即使贏到相信都係小勝格，玩細盤啱數。