護級戰錘仔扑雀唔手軟

猪拉多纳

英超護級大戰，「錘仔幫」韋斯咸主場對「金絲雀」諾域治，兩軍早前都靠「鐵桶陣」守和勁旅，但來到今仗「6分波」，冇得再縮，應會豁出去一博。論鬥攻搶分能力，「錘仔幫」勝一籌，隊長路蘭近兩仗轟入4粒，弗到漏油，領隊艾拿戴斯以往教波慣晒踢護級戰，經驗豐富，喺呢個生死關頭可佔上風，直取韋斯咸主勝。

（now 624周三凌晨3時45分直播）
諾域治焗攻好蝕底

韋斯咸悶和車仔一役，被對方主帥莫連奴鬧係踢19世紀足球，但細心諗下，以死守鬥勁旅，博1分屬人之常情。「錘仔幫」之後連續兩仗以2比0贏波，證明佢哋並非冇爭勝鬥心，只係因應對手而用唔同戰術，今仗對弱勢嘅諾域治，正係主攻求3分良機。除咗路蘭腳風順之外，達寧、卡頓高爾及上月來投嘅波里路，都係有質素嘅進攻球員，火力有保證。

「金絲雀」上仗作客爆冷守和曼城，並唔係表現好好，只係曼城自己把握力差，今仗對住護級對手嘅韋斯咸，亦唔會再求和，而係需要爭勝。不過，以佢哋近10場聯賽僅1勝嘅頹勢，勉強搶攻隨時偷雞唔成蝕把米。