車仔美斯蓄細待發

猪拉多纳

英超快車殺到埋身！

今周英超又開快車，今晚重頭戲當然係冠軍熱門車路士作客西布朗啦！「藍戰士」家陣霸住個英超榜首位置，今仗作客勢頹嘅西布朗，贏面極高，不過賽前莫連奴話班波得好少時間休息，之後又硬仗連場，今仗未必會搏盡大炒，嫌1.44倍客勝冇肉食，轉捧1.95倍入球細最明智。

（now621台周三凌晨4:00直播）

車路士上仗靠「車仔美斯」夏薩特大演帽子戲法，輕鬆贏紐卡素3粒，加埋同周阿仙奴及曼城齊齊失分，令「藍戰士」漁人得利登上榜首，尤其係夏薩特嘅表現愈嚟愈好，有佢就等於入波保證，一班「車迷」當然非常高興啦！
莫連奴：賽程唔公平

不過挑通眼眉嘅莫連奴仍然大把嘢講，佢日前就話上禮拜六踢完禮拜二又要山長水遠作客西布朗，相比之下，同樣喺上周六畀利物浦大炒完嘅阿仙奴可以遲一日先喺主場踢，勁唔公平喎！小妹相信莫帥咁講，其實係為咗令班球員知道今場唔易應付，要醒醒定定，唔好畀爭標對手有機會反超啫！
西布朗近6戰不勝

論近況，車路士真係好過西布朗多多聲，14場未輸過之餘，當中更有足足11場贏波添！最恐怖嘅係佢哋近8場波只係失1球，由伊雲洛域呢位帶刀侍衞同加利卡希爾為重心嘅防線極為硬淨，加埋今仗仲有「老大哥」泰利復出，近6戰僅得2和4負、7戰得1次入多過1粒嘅西布朗想有「士哥」？好難咯！

之不過，車仔嚟緊周末就要喺足總盃作客曼城、之後又要喺英超鬥愛華頓，硬仗連場，今晚極有機會出丹巴巴亞、舒賀爾尼同啱啱傷愈嘅費蘭度蘭利斯等高質副選出戰，而且快車作客舟車勞頓，今仗贏都可能係一粒起兩粒止，延續近7戰有5次開細嘅攤路。
乜都玩錦囊 車仔半場客W抵博

西布朗狀態差到冇朋友，家陣更深陷護級漩渦，其中一個原因係佢哋實在太過慢熱，例如上仗對水晶宮就喺早段被攻入兩球後，到下半場先至發力已經無濟於事。今仗對住實力高幾班嘅車路士，想唔輸都難，1.93倍嘅半場客W抵玩。
Data King 西布朗半場唔識贏

西布朗近3戰失8球，近7仗半場亦未試過領先對手。

車路士近5場有4次都喺半場先領先。

兩軍近6次喺西布朗主場碰頭，主隊未嘗喺半場取得領先比數。