黑貓攻城踢守「細」波

猪拉多纳

曼城過去兩場聯賽表現走晒樣，排名跌落第3位。今晚佢哋返到主場鬥新特蘭，要奪標真係不容再失。雖然「藍月亮」今場勢必出盡法寶力求反底，但連場激戰已現疲態，「黑貓」見車仔同諾域治死守戰術成功大有可能有樣學樣，入球大細中位數3.5球，不妨一試1.75倍嘅入球細！

（now623台周四凌晨3:45直播）

今季曼城主場真係好惡，但係車路士領隊莫連奴以一個3防中陣，成功打破「藍月亮」主場金身。上一輪曼城作客又被諾域治守死，出現連續兩場冇波入嘅罕見情況。一班曼城兵深明唔可以再失分，今場對住「黑貓」一定會大打身價波。不過，曼城呢支億萬大軍雖然號稱兵多將廣，但係中場雙核大衞施華同耶耶托尼無人可替，受緊湊嘅賽程影響亦已經疲態盡現。前鋒迪斯高近期缺態，尼格度啱啱復出，狀態未回復。今場曼城贏新特蘭應該唔成問題，但點睇都唔似會大炒對方。
新特蘭聯賽作客6場不敗

另一邊廂，「黑貓」自從作客5連敗之後，過去6場聯賽作客都冇輸過。今場作客曼城雖然好難複製早前大炒死敵紐卡素嘅佳作，但係呢場係佢哋「地獄賽程」嘅頭關，跟手仲要撼阿仙奴同利物浦，為求頭威頭勢，隨時擺出鐵桶陣博摸和！