拜仁作客o趙漢堡讓到兩粒都冇難度

猪拉多纳

今晚德國盃展開8強大戰，有近況極頹嘅漢堡主場鬥衞冕冠軍拜仁慕尼黑，堪稱「巨象與螞蟻之戰」！兩軍目前位於聯賽榜兩個極端，暫列尾二嘅漢堡喺歇冬期後連輸3場，家陣仲受換帥風波困擾，對住如日中天嘅拜仁難逃一場大敗，拜仁讓到兩粒都照捧2.15倍「讓客」啦！

（無線翡翠台周四凌晨3:30直播）
列貝利抖1星期

拜仁慕尼黑家陣喺德甲榜首遙遙領先13分，幾可肯定奪冠，今場喺德盃作客漢堡當然有餘力全力應戰啦！雖然列貝利剛啱做完臀部手術要抖1周，對阿仙奴場歐聯首回合賽事都唔踢得，但拜仁陣中猛將如雲又使乜驚吖！除咗最近大爆發嘅文迪蘇傑外，另一猛將馬里奧葛斯都有好消息喎，德國《圖片報》近日爆料指佢過檔拜仁前，同多蒙特嘅合約列明佢走人就可以收番轉會費嘅10%，即係話佢走佬之餘仲收番370萬歐元（約3,920萬港元），唔怪得喺拜仁踢到精神爽利，今季喺德甲及歐聯上陣14次交出9個入球同5次助攻，今晚要幫手o趙漢堡絕對冇難度。
漢堡馬加夫傾唔掂數

漢堡連輸3場0:3，計埋歇冬之前已經錄得6連敗，深陷降班漩渦，咁羞家，又難怪激到班球迷暴動連球員都襲擊嘅！近日本來傳出漢堡會搵番名將馬加夫執教，點知佢同班球會高層進行近8小時會議後仍然未能達成共識，全因佢心頭高想做球會行政總裁話晒事，激到班高層紮紮跳！之後11名董事局成員投票決定畀唔畀馬加夫重掌帥印，喺需要3分之2、即係8名董事投贊成票下，最後僅得5人贊成，睇怕漢堡短期內都好難搵到新帥救亡，場內場外都搞到立立亂，今仗唔輸鑊甘就奇啦！