世界漫遊:天之驕子(1)檔定江山

不死鸟

踏入五月各地經典大賽排住隊舉行，美國響上個禮拜五率先上演肯塔基橡樹大賽，就為全球馬迷帶着震撼一幕。呢場有135年歷史、只限三歲馬女角逐喺泥地千七米一級賽，大熱門Rachel Alexandra全程未開一鞭下，以按韁姿態過終點，拋離六匹對手二十個馬位以上，成為自1910年以嚟，呢項大賽取勝距離最遠嘅一屆。而佢所做嘅1分48秒87亦只比六年前Bird Town創下嘅紀錄時間慢0.23秒。

        賽後當地馬圈最關心係若果呢匹馬女留到噚日挑戰三冠頭關肯塔基打呲，到底會唔會將一班馬仔收服﹖呢個假設相信唔會咁快有答案，因馬主之一嘅Morrison賽後回應記者，佢話三冠大賽係未來種馬嘅表演舞台，關係全美以至全球嘅育馬業，所以雄馬應該跟雄馬比試，雌馬就留番同雌馬鬥，楚河漢界涇渭分明，言下之意，短期內呢匹新一代馬后將會集中火力跑馬女賽，兩性最強馬匹對決，最快都要留待三冠大賽完成之後先會上演。

        Rachel Alexandra令人嘆為觀止嘅表現，亦令曾響兩年前憑Street Sense捧走肯塔基打呲嘅鞍上人布利萊激讚，佢仲話呢匹馬女Rachel Alexandra係佢從騎以來最好一駒。

寶利多咪當冇到

        講番今日沙田賽事，上仗初出有追勢嘅「天之驕子」雖初跑千四米，但排一檔形勢有利，試準後隨時出冷。

        另外，試閘按住都衝上嚟嘅「心中有程」同近仗輸形勢多過實力嘅「寶利多」，有分頭千祈咪錯過。