FC北京升呢開春

猪拉多纳

聘名帥文沙奴 簽韓星河大成

亞冠盃第三圈外圍賽今日展開，廣州恒大上屆歷史性奪冠，令中國球壇大為振奮，大大刺激中超球隊要喺呢項大賽揚威，首都勁旅FC北京（北京國安）亦大肆擴軍，建立一支具爭霸實力之師，包括聘請前馬德里體育會主帥文沙奴執教，簽入南韓中場河大成，整體實力比上屆打入16強時更加強大，今仗主場出擊，足以輕取泰國球隊春武里，主W熱爆冇肉食，可博2.08倍讓球主勝。

（now 670周六晚7時30分直播）

北京國安多年來都係中超爭標分子，上屆亞冠盃亦進身16強，僅被後來奪亞的FC首爾淘汰。國安今季再接再勵，請來西班牙名帥文沙奴領軍，呢位57歲教頭曾經執教華拉度列、華歷簡奴、馬略卡、馬拉加、西維爾及馬體會等西甲球隊，其中03年率領馬略卡爆冷奪得西班牙盃冠軍，堪稱代表作，亦證明佢對應付盃賽好有心得，出戰亞冠盃可以大派用場。

國安新兵河大成上屆以隊長身份協助FC首爾打入亞冠盃決賽，大戰經驗豐富，對球隊亦大有幫助，國安獲得兩位重量級將帥加盟，級數「升呢」。由於外圍賽係一戰定生死，國安應會趁地利盡量數多幾粒，以免被對手有反撲機會。
春武里靠日職失意兵

春武里上圈以3比0淘汰本港球隊南華，但實力仍然同國安有距離，教練係49歲日本少帥和田昌裕，佢只有4年主教練經驗，陣中幾位跟佢搵食嘅日本球員都係未能喺日職立足嘅失意軍人，唔夠班同國安鬥。