巴塞速食冇骨魚腩

猪拉多纳

啱啱打入西班牙盃決賽嘅巴塞隆拿，今晚西甲返主場迎戰尾二嘅華歷簡奴。雖然巴塞嚟緊歐聯要火併英超勁旅曼城，好彩王牌美斯嘅狀態逐漸上力，周中重演一個扭幾個入波嘅屈機好戲，難得「冇骨魚腩」華歷簡奴送上門，佢仲唔拿拿臨起筷咩，就算讓兩球都冇有怕，照捧讓球主勝。
美斯上力炒起華歷簡奴

經過上年斷斷續續咁受傷，美斯復出初期明顯就住就住，仲畀人寸佢為世盃留力，隨住不斷有比賽，美斯嘅狀態及信心亦持續上升，周中西盃4強次回合作客皇家蘇斯達，呢位球王喺中場截到波後即刻加速，狂爆40碼連過四關先開紀錄，典型美斯屈機士哥，帶領球隊殺入決賽，睇得出佢嘅狀態冇十足，都有番八九成喇。唔單止咁，美斯亦轉晒性，聽從主帥馬天奴嘅戰術安排，墮後一格幫手做波，阿歷斯山齊士、柏度洛迪古斯、基斯甸泰路士哥頻頻，都係多得美斯嘅鋪橋搭路。

華歷簡奴今季「響朵」之作，就係喺首循環對碰嗰陣以54.5%控球率戰勝巴塞，令「地上最強」近5年來首次於正式比賽控球率低過對手，不過嗰場波華軍慘吞4蛋，證明呢班波好睇唔好食，難怪依家淪為尾二喇。撞啱巴塞前鋒個個都快到無倫，華歷簡奴繼續咁踢盞衰多兩錢重，加上佢哋近6次交手輸晒之餘，仲被狂轟26粒，名副其實係「冇骨魚腩」，今晚實畀巴塞一班「食家」擦餐飽咩，為下周中歐聯硬撼曼城狀行色，贏3粒依絲執喇，不妨直取讓球主勝。
now 632周日凌晨3時直播