三線作戰難倒利華希比亞

猪拉多纳

德甲二哥利華古遜主場迎戰四哥史浩克04，利華古遜賽程緊密忙到嘔，今晚面對實力唔比佢哋曳，狀態正處於巔峰嘅史浩克，就算主場都冇勝算，史浩克受讓平半吼下盤。

希比亞今季首次獨挑大樑執教利華，面對三線作戰賽程經常進退失據，去年九月歐聯大戰曼聯，喺球隊只落後一球時竟然嗱嗱聲收起晒三大進攻主力傑斯寧、孫弘民同悉尼森姆，放棄抵抗留力下場聯賽，但球隊當時形勢唔算曳，令人無法理解；以為佢重聯賽輕歐聯啦！去到十一月聯賽作客布倫瑞克，佢收起主力留力幾日後歐聯對薩克達，結果遭榜尾球隊球隊擊敗後，歐聯亦贏唔到波。

今仗賽前三日利華喺德國盃八強戰主場對乙組仔凱沙羅頓，希比亞又玩留力，見形勢唔掂先派精銳紛紛上陣，但畀人踢順咗已失先機，最終仲要踢到加時畀凱沙羅頓踢出局，搞到力疲心傷。今仗距離利華搏完德國盃百二分鐘後只有三日，嚟緊下周中又有歐聯火併巴黎聖日耳門，三心兩意嘅希比亞又會唔會全力出擊呢？
史浩克大勇 作客有分袋

史浩克歇冬後三戰全勝，自從防中起用紐斯泰達配奇雲保定效果奇佳，至今兩人合作四仗，史浩克三勝一和入九球只失一球，球隊中前場火力強勁，由於歐聯對皇馬要再下一周至踢，唔使就住就住，佢哋近五次對利華取得三勝一和佳績，今晚有權反客為主搶分。
有線61及64台 周日凌晨1時30直播