開行Turbo爭入前四維拉利爾捉切爾達祭旗

猪拉多纳

維拉利爾今晚會喺主場迎戰切爾達，「黃色潛艇」暫列西甲聯賽榜第5位，有力爭取下屆歐聯入場券，踏入下半季踢落明顯勁搏命。就講上場波吖，雖然佢哋以2:4敗走巴拿貝球場，但同皇馬踢起上嚟都互有攻守，表現一啲都唔輸蝕，今晚返到主場踢番咁嘅表現嘅話，到訪嘅切爾達邊會係「黃色潛艇」手腳吖，進取啲捧2.2倍「讓主」。

（now632、818台及TVB13周日清晨5:00直播）
切爾達作客遇強例大敗

維拉利爾暫時落後「四哥」畢爾包4分，要爭入Top4嘅話，今仗面對中游隊伍切爾達一定要去盡，戰意唔成問題。雖然陣中有衝刺型前鋒烏捷受傷上陣成疑，不過頂佢個位嘅莊拿芬彭利拿夥拍杜斯山度士領銜鋒線一樣夠睇頭，火力依然信得過。至於上仗因嚴重犯錯累球隊失波嘅後衞卓祖，今晚落到場實會打醒十二分精神，再犯錯機會怕且唔大。

對家切爾達家陣位列中游，表現中規中矩，但係去到客場就例牌跌watt ，近5仗作客只得1勝4負，當中只係攻入兩球咁大把，造訪皇馬同畢爾包呢類主攻型球隊更加係大敗收場，今晚遇着火力唔錯嘅維拉利爾，情況並唔樂觀。